دعوه للرومانسيه

نظرا للاجواء الي اتحيط فيني احس كل شي يدعو للرومانسيه ... للـهم لك الحمد جوو خيال عجيب بس ناقصنا براد ..الكل يقرر فجاه يلبس احمر وردي الوان تحسسك بأيام حب ..طبعا فجاه الشي الوحيد الي ماتوقعت بدريتي انه حتى البورصه تعلن الحب
وتلبس
احمــــــــــــر
p:
~ ~ ~ ~

(ان تعود إلي الرسم إي تعود إلي الحب )
بيكاسو

حايشني مود انه أبي ارسم وقررت انه ارسم طبعا من كنت صغيره وانا ارسم واحب الرسم
بس مافكرت اني اتخصص بشي معين بالرسم فقررت انه اتعلم ارسم بالزيت
وفعلا عزمت وسجلت بدوره
كل من سالني عن اخر انجازاتي واقول ماخذه دوره رسم
طبعا قمة لاحباط
ماكوو شغل
ترسمين
وفيه ناس عسى الله مايخليني منهم
عفيه علي فنانتا الصغيرونه
يلا ننطر
لوحاتج
:)

وايد صايره احب الهدوء
اسمع فيروز
واناارسم
و بكلاس الرسم لاحظت انه اغلب الطلبه يختارون الوان وايد هاديه
وكله يرسمون ورد واشياء صج تدعو للرومانسيه

(الرسم ...في النهايه لانرسم مانسكنه ..وإنما نرسم مايسكننا..)

احلام مستغانمي
ذاكرة الجسد
~ ~ ~

صايره اقري 3 كتب بوقت واحــد
في كتاب للشاعره صدي الحرمان
اشعارها
حلوه
وان شااءلله انزل لكم بوست عنها
~ ~ ~

ودعوه للكل يعيش في رومانسيه بهالأجواء الحلوه براد وغيوم وابتسموو وأنسوو الهموم
ولا تخلون أي شي يعكر هالموود

(إن مـافي أعماقنا هـو لنـا ولن تطوله يـد أحـد ...)

أحلام مستغانمي

...

شيء ..يشبه الحب

شفـت الهـوا البــارد ليمـر

شفـت النسيــم و ريحـة الـــورد

اتـعرف الهــدوء و راحــة النفــس

هذا انت

بـدنيـــتي

مثــل أبتسامه مـرت و زرعت لي بسمتي

نـــــــور

22\10\2008

مبارك عليكم باجي الشهر

مبارك عليكم باجي الشهر

وتبون الصج ضايق خلقي لانه بيخلص احس مر بسرعه

وكاني انا رديت ولهت عليكم

الكل مستغرب بعدي عن النت فتره طويله

بس هذا من ضمن إجازتى

طبعا للحين مارديت ديرتي الكويت لاني ولهت عليها

ولهت علي شوارعها وبيوتها

وعلي عمتي وتشريبتها

وصب القفشه

~~

قررت أسرتى الكريمه انها تقضي رمضان في مكه

صج كان رمضان غير هالسنه

كل يوم ناس اتروح و ناس اتي

كل يوم اشوف ناس اعرفهم وناس ماعرفهم

وطبعا زحمه

بس زحمة حلوه

لانها زحمه علي عباده مو زحمه علي معصيه

وطبعا كل سنه اقرر اني اسوي رجيم ولا اكل أكل دسم بس للأسف حجي

وكل يوم هذي سالفتي اقول

ياناس انا قررت اسوي رجيم بليز إذا شفتوني اكل ذكروني اني اسوي رجيم

~~~

~

مادري ليش صارلي فتره بكتب ولا ادري شنو اكتب

صج خذيت إجازه مع نفسي

ولا من كثر لبحتي

يمكن خذيت إجازه 14 يوم بروحي

وحسيت بالوحده

تبون الصج

الوحده احس شي مميت

صج بالأول احس بهدوء

بس عقب 4 أيام غلقه

ماخليت احد ماتصلت عليه

وكل من كلمني يقول هاا مو انتي تبين تعقدين مع نفسج

اقولهم اي ماخلصت إجازتي مع نفسي

بس أنتو كسرتو خاطري وقلت اسمح بمروركم بإجازتي

واشكر كل من

كاريزما

صبا

سؤالكم ومباركم الشهر لي فرحني

:**

~~~

~

شارف رمضـان علي الرحيـل

أعـاده الله علينا وعليكم بعمر مديد

فأريد ان أعتذر لقلوب

أحبتي

لا أعلـم اهي راضيه عني

ام

ساخطه علي

لفعل جهلته او تقصير تماديت به

فاعيد لقلوبها صفائها

(اسفه)

من القلب لكل القلوب التي احبتني واحببتها

وتقبل الله منا ومنكم صيامنا وقيامنا

وكل عام و انتو بخير

~~

.

إجازه ...مع نفسي

هاي أشلونكم ولهت عليكم

سوري إذا طولت عليكم

مادري شنو فيني صارلي مده مالي خلق اكتب ولا اعبر ولا يطلع شي من قلبي

مادري شنو صايرلي

هل هو تأثير الحر

او

الغبار

او مرحلة اللاشعور

مالي خلق اروح شوبينغ

ولا لي خلق اسافر مع ناس اعرفهم

ودي اسافر بروحي

ابي سفره ماكلم فيها احد

ابي ديره ماعرف فيها احد

ابي ديره كل يوم مطر

ابي ادلع نفسي بروحي

اقري كتبي

اشخبط بلوحاتي

اشوف افلامي

اتسوق بروحي

مع انه هالاشياء اسويها بالكويت

بس احب اسويها و انا مسافره

صايره اكشت بالزواره ولا اروح

يتصلون علي يقولون وينج

اقولهم إجازه

ماخذه إجازه من كل شي

مرات احس فيني شي مو طبيعي ليش احب اقعد بروحي

بس مرات احتاج اني اخذه إجازه من ناس اشوفهم طول السنه

ابي اغير من الناس الي اشوفهم

عشان اشتاق لهم بعد الاجازه

هل في احد مثلي جذي يحب يغير

او بس انا جذي

!!!

صايره اقري كتب و انواع من الكتب مختلفه

شنو تنصحوني فيه

؟؟

وان شاءالله هالصيف اقري واخلص هالكتب

صاير فيني طبع احس انه فشله

كل طلعه لازم يكون بجنطتي كتاب او مجله ومرات يكونون الانثين معا

يعني عادي اقعد بالكافي مع البنات واهم يسولفون وانا اقري

او اكون بالزواره وماتعجبني السالفه

اطلع مجلتي او كتابي واقري

صج فشله مرات بس شنو اسوي

مالي خلق اسولف

احس حتى سوالفي تبي إجازه

ماكو سوالف

وين اتسافرون

شنو نازل بالسوق

سمعنا انج اتروحين تريقين الصبح

هــووو شمطلج بهالحر

طلعي عقب المغرب احسن

وين اتروحين

ورحتي المطعم الفلاني

متى تنامين

متى تقعدين من النوم

!!

ياربي ليش الناس اتحب تسأل

ليش هالطبع بالكويتين بالذات

توقعون طبع لازق فيهم من الأزل

او هوايه جديده يحاولون يمارسونها

!!

صوت يشبه .....الحزن

الأثنين ..يرن الهاتف الساعه السادسه صباحـأ
أسمع صوت حـزين...ما.ت ت...ماتت

لـم أستطيع النهوض في تلك للحظه..أحسست بغصه
تخنقني..كيف كانت بأحضاني بالامس..وكنت اطعمها بيدي..واخبرتها
لاتتركني أعـود وحيده..لاني احبـها..لـن انسى ذلك الوجه أبدا و تلك النظـرات
وأعينها كانت خائفه..أخبرتها ماذا ترين اخبريني ...لـم ترد من شدة مـا رأته
حـاولت بأن اسرق عيني لمكان رؤيتها ..ولكن لم أري شي لم أري سوا فضاء يخنقي من شدة الخوف ..
لـن أنسي تلك النظرات الخائفه ..أبدا أبدا
هل أنـا بحلـم
متى أصحوو منه
هي لم تمت
لم تمت
أنـه حلـم ...أريد النهوض منــه لآني أختنق

الثلاثاء ..مطـار هيثرو الساعه السابعه صباحا ..قررت بأن أودع تلك الشرفه
وذلك المنظـر الذي أسرح أمامه لساعات دون ملل..ولا أشعر ببرودة الجـو من حولي
وجودها حولـي كان هو مدفأتي..

لـم اصدق رحيلها حتى دموعي في ذلك اليوم سكنت في عيني
وأكتفيت بوجه شاحب يفقد البهجه في الحيـاة

المكـان مطـار الكويت الساعه 7 مساءً ....لا أدري بأي وجه
سأقابلهم ولا أدري بما أخبرهم و كيف اخبرهم ..هل اخبرهم بأني اخر من سمع كلماتها
اواخبرهم عن تلك الحظات المخيفه الي سكنت في عينهـا..هل أخبرهم باني لا استطيع العيش بدونـها
او اخبرهم بأنها مامت و انا أحتضنها ...
لن أنسى تلك النظـرات الي كانت تخبرني أين هي ..و لم أشعر بثقـل كثقل تلك الخطوات ..كان الوقت يمر كالسنين ..أحسست ببعد ذلك البيت الكبير الذي جمعنـا بدفـأهـا ...وحملت أجمل شي في هذي الدينا و هو أسمها

المكـان ..أمام غرفتها ..تلك الغرفه التي فقدت النـور من بعدها ..أدرت مقبض الباب ...و أخرجت كل الألام التى سكنتني .......

هديــل ...صوت الحمامه

هديـل..أعرف بأنكي لاتقرأين كلماتي الأن...ولـكن لا اعرف هـل نلتقي عن قريب أم بعيد ..لا اعرف
و إن شاء الرحمان ...في جنات الخلـد يكـون ذلك للقاء...لن انسى تلك الابتسامه العذبه ولا محاولات اللقاء بيننا
ولا حتى الأحرف و الكلمـات الي ترسم الحياة من حولنـا...لا تعرفين مدي الالـم الذي أصابني ..عندمـا علمت بأن باب الجنه ..وهديـل ..هي انتي التي فقدتها من عدة أشهر ..لم أعلـم بموتها إلا من عدة أيام ...ألمني ذلك الفراق و بكيت و أنـا بين تلك الكلمات أبحث عن صوت الحمامه ...هديـل
اللـهم أرحمها وأسكنها جنات النعيـم

مذكـرات تحت المطــر

في يوم كنت انتظر نزول المطـر فيه

اشتقت الي لندن وشوارعها الرماديه و اشجارها البيضاء اشتقت الي تلك الشرفه الي كانت تطل علي الهايدبارك كنت اراقب الماره و الخيول و الثلوج و لامطار و شجره الكستناء

الشيء الوحيد الذي رجع معي هو شال جدتي اتذكر يوم لاحد عندما كانت بحضني عندما كنت اضمها بيدي حتي انفاسي كانت تضمها اتذكر ذلك السرير اخر شيء جمعنا حولها و اتذكر ذلك الثلج الذي خنقنا و صوت لاسعاف

و اتذكر

و اتذكر

و اتذكر

و اتذكر

ومــازال ذلك الشال الذي به بقايا عطرك احتضنه لاتذكر انفاسك

و ابتسامتك و شعرك لابيض الذي كنت العب به

.

.

.

.

يرن الهاتف

كانت صديقتي المتصله تخبرني عن الجو و تحتاج للهروب قليلا من الجو

اخبرتها انا ادعوهـا الى المريخ لانه افضل مكان للهروب من العالم

قصدنا مطعم فرنسي علي البحر كان هادي الاجواء يصلح للهروب احيانا

و اجمل شيء فيه باني بالكاد اري الطاوله و و جه صديقتي كان كل شيء ساكن امام البحــر حتى القمر في تلك لليله اعلن السكوت واطلق العنان للشموع حتى المرايا عكست ضوء القمر و الشموع كاني اعيش في منزل زجاجي امام البحـر الشيء المخيف في البحـر بأنه كان مظلم تحت ضوء القمـر و انعكاسات الشموع كان يرتدي السواد مثلي استغربت حزنه تلك الليله سألت صديقتي هل هو حزين ردت ببتسامه و قالت .... يشارك احزان البشــر

.

.

.

.

يتبـع

28\2\2006

25\5\2008

يوم ميلادي كان لويه بالنسبه لي صارت اشياء ماكنت اتوقعها كلش

طبعا كل سنه افضل انه اعيش هاليوم غير ومرات يصير فيه اشياء حلوه ومرات لا

و مرات اتمني اني اتخلص من روح لاكشن الي اتصير فيني هاليوم كل شي غريب ماسويته اسويه

احط لي لسته شنو بسوي و شنو بخلي و احط لي هدف ولا ابي حياتي اتمر و سنين عمري تمر بدون هدف

وايد اطالع تلفوني حتى لو وصلني مسج من وحده ماتدري انه يوم ميلادي استانس و اكره كل شخص يدري انه يوم ميلادي و لا يتصل او يدز مسج

طبعا احلي اتصال كان من انسانه ماكنت اتوقعها كلش ولا المشكله كنت تو زافتها علي شي اهي مسويته

انطرت تصير الساعه 12 وقالت لي كل عام و انتي بخير

طبعا تبون الصج مابي اكبر ابي اصير صغيرونه

مابي كل ماشلت سنه من عمري زادت مسؤليتي

.

.

.

.

احلي ماقيل لي في هذا اليوم

***

غير معرف يقول...
اسمي : شاشتي مكسوره مثل شاشتها :)

سبب الزيارة : عيد ميلاد بعض الناس

اهلا وسهلا والسلام عليكمو وتحية منا تزف اليكمو احبابنا ما اجمل الدنيا بكم لا تقبحو الدنيا وفيها انتمو

مساء الورد والعسل

مساء الاعياد والنخل

مساء الابتسامه والامل

مساء كل عام وانتي بخير وبداية عمل

مساء تبدين صفحة جديدة وتودعين الكسل

كنت اتمنى ان اكون قريبا لاحتفل معكم بهذه المناسبه ولكن لسوء حظي ولأن قطرات المطر اللي بالدوام نادتني ( والصمخه اللي ابالي اللي ما تسمع صوت المطر ختموت حره ) لوول

لكن عزائي بعدم وجودي هو ان تكون هذه الكلمات حاولت ان ترسم البسمه على ويهج مو عشاني عشان يحيى :) لووول

ختاما :كثيره هي الصدف لكن اكيد هي قليله التي تجمعنا بناس مثلكم وشرواكم وشاشتهم مكسوره مثل شاشتيفي هذا المساء الجميل اتمنى من كل قلبي ان تكون هذه السنة سنة خير عليج وسعاده وصحه ووناسه

ملاحظة :اول مره اكتب في بلوق فأرجو المعذرة على ردائة الاسلوب ولكن (( من لمح فجر الاجر هان عليه ظلام التكليف ))اللي ما فهم العباره الاخيره يسأل الشاعره المبدعه مرآة الزمان ادري طولت بس اخر شي ام فلااان خلاص بسج لا تجابلين المنظره وايد :) لوول

مع السلامه

**

شكرا علي هذي الكلمات

و اشكر كل من ستااربكس البدع و شوكلت بار البدع و محل الورد الي يمه

لانهم غنو لي و صج استانست

و طبعا عمركم شفتو وحده تشتري لعمرها ورده و كيكه هذي انا

و اكثر شي فرحني بيتنا

رديت لقيت خالاتي و عمتي ناطرين ردتي للبيت و حسيت الكل فرحان

طبعا مو الكل في ناس يقولون حرام مانحتفل

بس ماعليه انا مااحط انه عيد بمعني عيد لا انا احط انه يوم مهم في حياتي كبرت فيه سنه

و سنه من عمري طافت و احب اني احتفل فيه

وبس

من الفرحه نمت بدون عشا

لانه قررت اسوي رجيم

..!

ها أنت قريب,
على مرمى دمعة مني,
وبعيد..
على مرمى عمر !
.

.

.

.

غاده السمان

بابا سعد في ذمة الله

اللهم ابدله دارا خيرا من داره واهلا خيرا من اهله وادخله الجنة واعذه من عذاب القبر ومن عذاب النار .اللـهـم عاملة بما انت اهله ولا تعامله بما هو اهله .اللـهـم اجزه عن الاحسان إحسانا وعن الأساءة عفواً وغفراناً.

اللـهـم إن كان محسناً فزد من حسناته , وإن كان مسيئاً فتجاوز عن سيئاته .اللـهـم ادخله الجنة من غير مناقشة حساب ولا سابقة عذاب .اللـهـم اّنسه في وحدته وفي وحشته وفي غربته.

اللـهـم انزله منزلاً مباركا وانت خير المنزلين .اللـهـم انزله منازل الصديقين والشهداء والصالحين وحسن اولئك رفيقا .اللـهـم اجعل قبره روضة من رياض الجنة ,ولا تجعله حفرة من حفر النار

.اللـهـم افسح له في قبره مد بصره وافرش قبره من فراش الجنة

.اللـهـم اعذه من عذاب القبر ,وجاف ِالارض عن جنبيها

.اللـهـم املأ قبره بالرضا والنور والفسحة والسرور.

اللـهـم إنه فى ذمتك وحبل جوارك فقه فتنة الفبر وعذاب النار , وانت أهل الوفاء والحق فاغفر له وارحمه انك انت الغفور الرحيم. اللـهـم انه عبدك وابن عبدك خرج من الدنيا وسعته ومحبوبيه وأحبائه إلي ظلمة القبر وماهو لاقته .

اللـهـم انه كان يشهد أنك لا إله الا انت وأن محمداً عبدك ورسولك وانت اعلم به.

اللهم ثبته عند السؤال

للهم انا نتوسل بك اليك ونقسم بك عليك ان ترحمه ولا تعذبه اللـهـم انه نَزَل بك وأنت خير منزول به واصبح فقير الي رحمتك وأنت غني عن عذابه .اللـهـم اّته برحمتك ورضاك وقه فتنه القبر وعذابه و أّته برحمتك الامن من عذابك حتي تبعثه إلي جنتك يا أرحم الراحمين .

أول حب في حياة الرجل

اليوم كان متعب بالنسبه لي بعد التسوق بالأفنيوز و كان محور الحديث عن حياة الرجل و طبيعة تكوينه العاطفي و هل اول قصة حب أتأثر بحياته و هل التغيرات المناخيه اثرت في قصص الحب في هالزمان وايد فكرت في هالموضوع و لفت أنتباهي الحب القديم و الحب اليديد علي حسب الزمن يعني وانا امشي بالسوق شفت مصري عمره بالستينات او السبعينات اهو و زوجته وماسك ايدها و يساسرها و احس انه طاير من الفرحه و اهو يمشي معاها الله يهنيهم بس عجبني الحب الي بينهم و اهم بهالعمر ولمي اشوف كويتين توهم صغار اعمارهم بالثلاثينات كل واحد بصوب و يمشي معصب اتحسون غصب رايح معاها السوق و المشكله اعرفهم يعني توهم متزوجين صارلهم 3 سنين يعني استغرب اشوف ناس اعمارها بالستين و اشلون الحب بينهم و اشوف بالثلاثين و اشوف الجفا بينهم .
طبعا اليوم رديت من السوق تعشيت و قلت اشوف افلام ام بي سي 4 اكيد في شي رومانسي عندهم محور الفيلم انه في ريال مادري اشلون من سنة 1875 وصل للالفيه الثالثه او مادري المهم يعني بهالزمن و طبعا تختلف عنده اساليب العلاقات و التعامل مع المرأه كان وايد راقي رومانسي وايد يستغرب من زمن الريايل الي معاه ليش جذي يبدون علاقاتهم و كأنه المرأه أله ولازم ترضي فيه,وعنده أساليب الأعتذار راقيه ,المهم كان يعرف اساليب رومانسيه و اسلوبه بالحجي عجيب لدرجه انه خله هالانسانه العمليه الي اتحب شغلها ولا اتعرف تتعامل مع الريايل انه اتحبه و تفهم كل شي يسويه علي شانها و اتحس بفرق شاسع بين ريال من سنة 1875 و بين الريال من هالوقت اسم الفيلم اتوقع كيت و ليو مو متأكده من اسم الريال عدل لاني بنص الفيلم كنت افكر بين حب قبل و حب الحين و من كثر ماهو رومانسي انا نمت ههههههه ولا شفت النهايه , بس لا قمت من النوم عشان اشوف الإعاده ولا قدرت انام عقبها وايد شغلت بالي هالفكره هل الزمن ينسي الأنسان المعني الحقيقي للحب او فن التعامل ,
لمي اشوف و اسمع قصص الحب الي بالواقع و صارت يعني 80% ينتهي بالطلاق و 10% منهم ماكو ثقه و10% لا خوش ناس الله يهنيهم يعني لمي اشوف الاسباب شنو يكون الرد نسي الرومانسيه كل انسان يشوف مصلحته يتحاسبون علي الفلوس و يركضون ورا الماده يعني اسباب احس انه هالزمن وهالوقت له اثره فيها,
يعني ماخذين بعض عن حب اكيد انحب الشخص بعيوبه او انحاول انعدلها بس ماتنتهي انه خلاص مافي احد يتحمل الثاني , وفي ناس ماكانت بينهم علاقات كلش وتزوجو و80% نجحت علاقاتهم و مستمره طبعا لازم في ملح و فلفل بالحياة من خلافات وفي تترك أثر و في اتزول مع الزمن ,بس في شي وايد شغل بالي 20%هالفئه لهم حب سابق و لهم علاقات سابقه ماقدرو ينسونها يعني اول حب في حياة الرجل اول حبيبة له لو يعرف عقبها 100 ماينسي الأولي و يقدريحب عقبها بس اهي غير اول مانبض قلبه لها فتكون غير بكل شي حتى لو شافها عقب حتى لو كانت عيوز بعيونه غير يسمي علي اسمها بناته و حفيداته يحس حتى لاسم بياخذ من حبيبته حلاتها
و مره سمعت انه في دراسة امريكية اثببت انه الريال قلبه يستوعب 4 نساء و المراة يستوعب قلبها شخص واحد
بس الأسلام سبقهم بهالشي و احل انه الريال يتزوج 4 او واحده إذا ماقدر يعدل يعني مهم العدل بالأسلام .
ومرات افكر بحال المرأه انها اتحب و إذا حبة ماتشوف إلا اهو و اتغار عليه من كل شي و اهو عندها بالدنيا كلـها ولا تقدر تعطي او اتحب 2 بنفس الوقت لانه قلبها بس ياخذ واحد و يمكن ماتنسي اول حب لها بس الي انا متأكده منه انها ماتنسي اول خيانه لها يمكن اتسامح بس مستحيل تنسي وينقلب هالحب كره و تحاول تنتقم , طبعا لو بتكلم عن حب المرأه مااخلص اليوم بس انا الي ابي اعرفه عن اول حب في حياة الرجل هل يقدر ينساه ؟

البـطاله

طبعا مو شي غريب او شاذ بالمجمتع لمي تكون متخرجه من الجامعه او الكليه قاعده بالبيت
ناطره وظيفه سنعه تناسب تخصصه و علي مزاجها و هالانسانه البطاليه الي ماكو شغل و مشغله
يا كثر التشره عليها الكل يتشره و الكل يسأل توظفتي او لا متي ماصارت
قبلي أي وظيفه مسكي لج مكان يا بنت الحلال قبل لا اتخلص الوظايف
طبعا انا مليت من كثر مارد علي كل شخص يسألني هالسؤال
و اقول لهم انطر التشكيل الوزاري القادم ان شاء الله لاني شاكه انه اسمي من ظمنهم <<<عايشه الدور طبعا أي بنت بطاليه بدون وظيفه تكون اول الناس في السوق اتشوف شنو نازل من موضه تلفونها مايسكت كله اتصالات عندي استقبال عندي عرس ابي اغير للوك أي مجمع ؟وين المحل ؟ماعندهم خصم !! الكل يتصل عليها يقول لها ماعندج شغل تمشين نطلع , نتعشي( طبعا اتكون حافظه منيو المطاعم) ,أنروح سينما (شافت كل الأفلام), نشرب قهوه ,انروح الممشي طبعا علي طول فاضيه وإذا قلت لا ماقدر شنو عندج من شغل لا شغل ولا مشغله !!!
يعني ماكو مفر من التشره كلش ! طبعا البطاليه كله مجابله التلفزيون مافي مسلسل تركي كوري ماتابعه ,الكل يسألها عن لاحداث وكأنها مخرجة هالمسلسلات ,و حافظه حزة الإعاده و الساعه جم تنعرض؟
صديقة صباح الوطن وتولليل ومافي دعايه او إعلان بالجرايد ماتعرفه ,تتكلم بالسياسه (طافها مجلس لامه ) وأول شخص ينزعل منه إذا ماحضرت استقبال او عرس و إذا اعتذرت هووو شنو عندج لا شغل ولا مشغله ولا ريال ولا عيال !!!
ياربي شنو لازم يكون عندي وظيفه او ريال او عيال عشان اكون مشغوله ليش لانسان مايكون تعبان مثلا صخونه او يكون مسجل بدورات مولازم اقول انا شنو عندي مومعناته ان الشخص الي ماعنده وظيفه انسان فاضي انا عن نفسي الانسان الي ماعنده وظيفه يعيش وظيفه كل انسان بحياته مرات يكون سايق ومرات يكون مدرس و مرات يكون محامي و مرات يكون طبيب نفسي و مرات يكون دكتورشعبي ومرات طباخ و اخيرا و ليس اخرًا مكمل مشاوير !! طبعا انا أُطالب وأُناشد بشده عدم التعرض او التشره لهذي الفئه من المجتمع و إقامة جمعيات خاصه تحافظ علي لحماية حقوقها الشخصيه حتى تجد مايناسبها من العمل في الجهات الحكومه او الجهات الخاصه .

مذكـرات تحت المطــر

في يوم من ايامي الممطره بينما كنت كالعاده اركب سيارتي و اتمشي بين الطرقات في العاصمه كنت اقصد محل لاثاث اعجبني كرسي ايطالي الصنع شفاف اللون احببته من اول نظره ذهبت لاشتريه لي كرسيان لي و للقادم الجديد احب لاشياء الشفافه في الكون لا تخفي شيء تتميز بالصفاء في عيني احب قلوب البشر الشفافه انتهيت من شراء الكرسي مع إطراء البائع بذوقي الشفاف ارد ببتسامه احياننا علي المجاملات عندما اختار شيء يعجبني لاانتظر من احد إطراء لمعرفتي بماء اختار كانت السماء في ذلك اليوم تبتسم للدنيا مع غيوم محمله بالمطر احب الخروج في جو ممطر

و اتعمد نسيان المظله

احببة السماء ذاك اليوم احسست بنزول المطر و الناس تجري تحت المطر و انا اتعمد بان امشي ببطيء و انا تحت المطر احب بان يبللني المطر في ذلك اليوم احسست بان هذا الجو يليق به شوكولاته ساخنه قصت محل Chocolate Bar الموجود في مجمع المارينا كان يخلو من الناس تقريبا و قررت مكافأة نفسي هذا اليوم احتفال بنزول المطر

مع انني كنت وحدي انا فقط و باقي ظلي لم انسي كاميرتي هذا اليوم لعشقي لتصوير لاشياء قصت طاوله قريبه من النافذه و تطل علي المرسي و البحر طبعا وانا جالسه في المطعم لاحظت بان اغنيه للمغني لانجليزي josh groban تعلو بالمكان و هي

Remember when it Rained

كانت لاجواء شبه ساكنه من حلوي و الشموع تحيط بي و الازهار و رائحة الكاكاوو الساخن احسست بانه كل ماهو حولي يرافقني وحدتي بدأت بالعيش مع كلمات الأغنيه

وتذكرتك عندما تمطر مع اني تعمت نسيانك كثيرا اتذكر هذا المكان الذي اخبرتك عنه و بأني سأحضرك هنا و لتذوق الكاكاوو و ترى جمال مدينتي في المطر حتى الغيوم في هذا اليوم كانت تغني حزينه لي احسست بنظرة حزن و هي تراني وحيده .

,,
,,
Noor

2006\1\20

البـدايات

بدايه اول طفل

بدايه اول كلمه

بدايه اول خطوه

اخشى البدايات في كل شي في اول يوم مدرسه في اول يوم عمل في اول لقاء لعلاقه جديده في اول بيت جديد

وفي اول يوم جديد

تلك هي الأقدار ترسم البديات لنا

مع الأيام

~~~~~

الدنيـا محطه

والانسان فيها مجرد عابرسبيل يصادق فيها من يحب و قليل هم من يوفوق

فأتمني ان نكون ذكري طيبه تعطر فم كل

من

يذكـرنا

***

مـادري شنو اكتب او اقول في اول يوم واول لقاء

لـكـن

احب اني ادخل هالعالم

بإبتسامه

لكم